En cestuy iour, et les deux subsequens ne leurs apparut terre ne chose aultre nouvelle. Car aultres foys avoient aré ceste routte. Au quatrieme descouvrirent une isle nommée Medamothi, belle à l’œil et plaisante à cause du grand nombre des phares et haultes tours marbrines, des quelles tout le circuit estoit orné, qui n’estoit moins grand que de Canada.
Pantagruel s’enquerant qui en estoit dominateur entendit, que c’estoit le roy Philophanes, lors absent pour le mariage de son frere Philotheamon avecques l’Infante du royaulme de Engys. Adoncques descendit on havre, contemplant, ce pendent que les chormes des naufz faisoient aiguade, divers tableaulx, diverses tapisseries, divers animaulx, poissons, oizeaulx, et aultres marchandises exotiques et peregrines, qui estoient en l’allée du mole, et par les halles du port. Car c’estoit le tiers iour des grandes et solennes foires du lieu : es quelles annuellement convenoient tous les plus riches et fameux marchans d’Afrique et Asie. D’entre les quelles frere Ian achapta deux rares et precieux tableaulx : en l’un des quelz estoit au vif painct le visaige d’un appellant : en l’aultre estoit le portraict d’un varlet qui cherche maistre, en toutes qualitez requises, gestes, maintien, minois, alleures, physionomie, et affections : painct et inventé par maistre Charles Charmois painctre du roy Megiste : et les paya en monnoie de Cinge.
Panurge achapta un grand tableau painct et transsumpt de l’ouvrage iadis faict à l’aiguille par Philomela exposante et representante à sa sœur Progné, comment son beaufrere Tereus l’avoit depucellée : et sa langue couppée, affin que tel crime ne decelast. Ie vous iure par le manche de ce fallot, que c’estoit une paincture gualante et mirifique. Ne pensez, ie vous prie, que feust le portraict d’un homme couplé sur une fille. Cela est trop sot, et trop lourd. La paincture estoit bien aultre, et plus intelligible. Vous la pourrez veoir en Theleme à main guausche entrans en la haulte guallerie.
FIN DE L’EXTRAIT
______________________________________
Published by Les Editions de Londres
© 2015 — Les Editions de Londres
ISBN : 978-1-910628-23-2